Time журналы 16 жастағы экобелсенді Грета Тунбергті “Жыл адамы” деп атады.
Швед оқушысы Тунберг саясаткерлердің климаттың өзгеруі мәселесіне мән беруі үшін өткізілген акциялардың ұйымдастырушысы ретінде танылған.
Журнал редакциясы Тунбергтің климаттың өзгеруіне қарсы күрескен еңбегін ғана емес, өзге елдердегі қатарластарына үлгі болып, оларды қоғамдық іспен айналысуға итермелегенін да атап өткен.
Грета Тунберг өткен жылы оқушылар ереуілін ұйымдастырып, көпшілікке таныла бастады. Оның бастамасымен Швецияда оқушылар жұма күні сабақтың орнына климаттық өзгерістермен күреске шақыратын акция өткізген. Биыл бұл қозғалыс дамып, әлемнің ондаған елінде қолдау тапты. Ірі көлемде өткен табиғатты қорғау акцияларына миллиондаған адам қатысты.
Қыркүйекте Тунберг Нью-Йоркте өткен БҰҰ-ның климат саммитінде сөз сөйлеп, саясаткерлерді болашақ ұрпақтың игілігін ойламай, “балалығымды ұрладыңдар” деп айыптаған. Бұдан кейін Тунбергті мақтағандар да, сынағандар да болды. АҚШ президенті Дональд Трамп, Ресей президенті Владимир Путин, Бразилия басшысы Жаир Болсонару оны сынады. Ал жас экобелсендіні қолдағандар арасында АҚШ-тың бұрынғы президенті Барак Обама мен Германия канцлері Ангела Меркель бар. Қазір Тунберг Мадридте климат саммитіне қатысып жатыр. Ол бұл жолы Америкадан Еуропаға катамаранмен жүзіп келді. Экобелсенді ұшақпен ұшудан бас тартып жүр.
"The eyes of all future generations are upon you. And if you choose to fail us, I say we will never forgive you."
— @GretaThunberg at UN #ClimateAction Summit. https://t.co/g4uXzT9aRM pic.twitter.com/2nBzFxsnxP
— United Nations (@UN) September 23, 2019
Time журналының “Жыл адамы” үміткерлерінің тізімінде АҚШ өкілдер палатасының спикері Нэнси Пелоси, АҚШ президенті Дональд Трамп, Трампқа импичмент жариялау ісіне түрткі болған шағымды түсірген арнайы қызмет өкілдері және Гонконгтағы қарсылық акцияларының қатысушылары да болған.
Басылым өткен жылы әртүрлі елден жиналған бір топ журналисті жыл адамы деп атаған.
Азаттық сайтының хабарлауынша, Time журналы әлем оқиғаларына ықпал еткен тұлғаларға мұндай атақты 1927 жылдан бері беріп келеді.
