Жоғарғы палата “парламенттік оппозиция” туралы заң жобасын қабылдады

0
40
Қазақстан парламенті Cенатының ғимараты.

28 мамыр күні парламенттің жоғарғы палатасы “Қазақстан парламенті және оның депутаттарының мәртебесі туралы” және “Қазақстан парламентiнiң комитеттерi мен комиссиялары туралы” заңға өзгерістер енгізу туралы заң жобаларын қабылдады.

Сенатта баяндама жасаған мәжіліс депутаты Азат Перуашев “заң жобасындағы негізгі жаңалық” құқықтық ортаға “оппозиция” ұғымының енгізілуі екенін атап өтті.

“Заң жобасында “парламенттік оппозиция” ұғымына берілген анықтамада бұл партиялар, әдетте, билік партиясынан бөлек өзгеше саясат жүргізуге міндетті деген тезис енгізілген. Яғни, біз “оппозициямын” деушілерді парламентте үнсіз жүрмей, белсенді жұмыс жүргізуге, қоғам үшін шын атсалысып, маңызды проблемаларды көтеруге, биліктің саясатына жаңа көзқарасы болып, бөлек ұсыныстарды беруге арнайы итермелеп отырмыз. Осындай партияларға, “парламенттік оппозиция” атағымен шектелмей, сол ұғымды мәртебесі мен құқықтық кепілдіктерімен толықтыруды ұсынып отырмыз” деді Азат Перуашев.

Құжатта оппозиция үшін “бірқатар құқықтық артықшылықтар қарастырылған”. Мысалы, әрбір сессия кезінде парламенттік тыңдау мен үкімет сағаттарын бекіту, үкіметтің заң жобасына балама заң жобасын ұсыну, парламенттің кез-келген іс-шарасына, мәжіліс пен сенаттың бірлескен отырысында сөз сөйлеу құқығына ие.

Депутаттардың бастамасымен жасалған “Қазақстан парламенті мен оның депутаттарының оның мәртебесі туралы конституциялық заңға толықтырулар енгізу туралы” заң жобасы биыл 13 ақпанда үкімет қарауына ұсынылған. Наурыздың 18-інде парламент мәжілісінің қарауына түскен.

Жақында президент Тоқаев құқық қорғаушылар мен қоғам белсенділері қатаң сынға алған “Бейбіт жиындар туралы”, “Саяси партиялар туралы”, “Сайлау туралы” заңға қол қойған.

ЖАУАП ҚАЛДЫРУ

Пікіріңізді енгізіңіз!
Мұнда аты-жөніңізді енгізіңіз