Ұшақ рейсі кешіккен жағдайда жолаушы қандай құқыққа ие

Рейс тоқтатылған немесе кешіктірілген кезде тасымалдаушы жолаушылар үшін жөнелту пункттерінде және аралық пункттерде келесі қызметтерді ұйымдастыруға міндетті:

1) 7 жасқа дейінгі баласы бар жолаушыға ана мен бала бөлмесін (болған жағдайда) ұсынады;

2) рейс 2 сағаттан артық кешіккен кезде телефонмен ұзақтығы 5 минуттан аспайтын екі қоңырау шалуға (оның ішінде халықаралық байланыс желілері бойынша) немесе электрондық пошта арқылы екі хабарлама жіберуге мүмкіндік ұсынады;

3) рейсті екі сағаттан артық күткен кезде жолаушыларды салқын сусындармен қамтамасыз етеді;

4) рейстің жөнелтілуін 4 сағаттан артық және одан әрі күту кезінде ыстық тамақпен қамтамасыз етеді:

– күндізгі уақытта әр 6 сағат сайын;

– түнде әр 8 сағат сайын;

5) рейс күндіз 8 сағаттан артық және түнгі уақытта 6 сағаттан артық кешіккен жағдайда авиакомпания жолаушыны өзі ұсынатын қонақүйге орналастырады;

6) авиакомпания ұсынатын көлік жолаушыны әуежайдан қонақүйге дейін және қонақ үйден кері жеткізуді қамтамасыз етеді;

7) тасымалдаушының кінәсінен рейс 10 сағаттан артық мерзімге тоқтатылған немесе кешіккен болса, тасымалдаушы жолаушыны билетте көрсетілген межелі пунктке дейін ең жақын рейспен тасымалдауды қамтамасыз етеді;

8) жолаушыға билеттің толық құнын қайтарады.

Бұдан басқа, авиакомпания нақты қандай да бір жағдайға байланысты рейстерді кешіктіргенін дәлелдемесе, онда әрбір кешіккен сағаты үшін жолаушыға билет құнының 3 пайызы мөлшерінде айыппұл төлейді. Өтемақы алу үшін жолаушылар тікелей авиакомпанияға хабарласуы керек.

Ескеретіні – бұл қызметтер рейстің кешігуі авиакомпанияның кінәсінен болған жағдайда ғана ұсынылады.