Ұлттық қордың инвестициялық табысының жартысы жыл сайын 18 жасқа дейінгі барлық жастағы балалар арасында бөлінеді. 18 жасқа дейінгі баланың жинақталуының болжамды сомасы шамамен 3,5 мың АҚШ долларын құрауы мүмкін. Бұл сома капитал нарығының құбылмалылығын ескере отырып, Тарихи деректер негізінде есептелген және әлемдік экономиканың конъюнктурасына байланысты түзетілуі мүмкін.
Ал халықаралық тәжірибедегі бай мемлекеттерде жаңа туған азаматтарына беретін сыйақы мөлшері қанша?
БАӘ
БАӘ азаматы тек осы елдің азаматтарының отбасында туылу арқылы ғана бола алады.
Жаңа азаматтың дүниеге келгені үшін бақытты ата-аналар 50 000 доллардан 200 000 долларға дейін, ал қажет болған жағдайда үй де алады.
Мұнай мен газдан түсетін кірістер және олардың артықшылықтарын пайдаланатын аздаған азаматтарға мемлекет болашағын қамтамасыз ету үшін шот ашады. Бала 18 жасқа толғанда шамамен 100 000 доллар жиналады.
Норвегия
Норвегияда ата-аналарға 18 жасқа толмаған әрбір бала үшін ай сайын 150 доллар төленеді, ал жұмыс істемейтін аналарға бала туылғаннан кейін 5 мың доллар көлемінде бір реттік жәрдемақы беріледі. Жүктілік және босану демалысы кезінде әйелдерге жалақы мен медициналық көмекке кепілдік беріледі. Балабақшаларда орын болмаса, ата-анаға баласы үш жасқа толғанша айына 560 доллар өтемақы төленеді.
Кувейт
Кувейтте мұнайдан түскен табыстың 10 пайызы болашақ ұрпақты дамыту қорына бөлінеді. Бұл қор халықтың әлеуметтік дамуына, қазіргі және болашақ ұрпақтарының біліміне инвестициялауға бағытталған. Бала туылған кезде отбасыларға қолма-қол ақша төленбегенімен, жаңа туған нәрестенің атына бастапқы сомасы 3000 АҚШ доллары болатын арнайы банк депозиті ашылады. Бала 18 жасқа толғанда, шотқа қомақты сома жиналады, ол оны өз қалауларына жарата алады.
Бес немесе одан да көп баласы бар отбасылар балалары өз бетінше ақша таба бастағанға дейін айына $200 көлемінде көмек алады. Үй шаруасындағы әйелдерге айына 300 доллар жәрдемақы беріледі. Балалар да осы қор арқылы барлық деңгейде білім ала алады, ал қордан қаржыландырылатын студенттер стандарттағыдан едәуір жоғары шәкіртақы алады. Сонымен қатар, қор медициналық қызметтердің ақысын жабады.
Аустралия
Әрбір жаңа туған австралиялық шамамен 3 000 АҚШ доллары сыйақы алады. Егер бір уақытта үш немесе одан да көп бала туылса, онда жыл сайын ата-аналарға егіздер 16 жасқа толғанға дейін осы сома төленеді.
Бала күтіміне бөлек қаражат бөлінеді, оны ата-әжелер мен күтушілер де ала алады.
Дереккөз: inbusiness.kz
