Солтүстік Қазақстан облысы Айыртау ауданындағы «Бабық-бұрлық» ЖШС бидай өнiмдiлiгiнiң рекордын жаңартты. Өңірдің ресми сайты хабарлағандай СҚО әкiмi Құмар Ақсақаловқа гектарынан 62,5 центнер бидай алынған алқап көрсетiлдi.
Бұрынғы рекорд 55 ца/га «Тұқым» ЖШС-ға тиесiлi болған едi. Осындай мол өнiмдi қалай алдыңыз деген сұраққа «Бабық-бұрлық» серiктестiгiнiң басшысы Сейiлбек Махметов қысқаша жауап қайырды: «Жермен айналысу керек».
СҚО аймағында күзгi орақ науқаны қыза түстi. 13 қыркүйектегi мәлiмет бойынша облыстағы алқаптың 32 пайызы игерілген. Орташа өнiмдiлiк гектарына 14,9 центнерден айналды.
