Сириядағы Идлиб қаласының Салсин көшесінде екі бірдей автокөлікті лаңкестер жарып жіберді. Жарылыста қаза тапқандардың саны отыздан асты. Бұл туралы РИА агенттігі ливандық «Аль-Маядан» телеарнасына сілтеме жасап хабарлайды.
Телеарнаның хабарлауынша, бірнеше тонна жарылғыш зат салынған екі бірдей жүк көлігі Салясин көшесінің орталығында орналасқан «Аль-Мири» супермаркетінің жанында жарылыс жасаған.
Қуатты жарылыстың әсерінен 30-дан астам адам қаза тауып, тағы бірнеше адам жарақат алған.
Euronews-тің мәліметінше, жарылыс Кавказдың жүздеген жихадшыларынан тұратын «Аджнад әл-Кавказ» радикал топтарының штабына қарсы бағытталған.
Сонымен қатар, бақылаушылар Ресейлік әуе күштерінің қолдауымен үкімет әскерлері Идлиб провинциясының оңтүстік-шығысындағы Синджар елді мекенін «Джебхат ән-Нусра» лаңкестік ұйымынан босатқандығын хабарлайды.
Сирия әскері өткен жылдың қазан айынан бері Идлибте бірнеше топқа қарсы шабуыл операциясын жүргізіп келеді.
