Кремль сайты Ресей басшысы Владимир Путин мен Түркия президенті Режеп Тайып Ердоған телефон арқылы сөйлескенін хабарлады.
Әңгіме барысында Ердоған Ресей тарапының Түркиямен әуе қатынасын қалпына келтіру туралы қабылдаған шешіміне, сондай-ақ ресейлік “Спутник V” вакцинасын жеткізуді бастағанына ризашылығын білдірген.
Президенттер Таулы Қарабақ төңірегіндегі жағдай бойынша пікір алмасқан. Тараптар атысты тоқтату мен әскери операцияларды бақылау жөніндегі бірлескен ресей-түркия орталығының жұмысын оң бағалаған.
“Түркия президенті Ресейдің, Армения мен Әзербайжан басшыларының 9 қараша мен 11 қаңтардағы мәлімдемелерінде бекітілген келісімдердің толық орындалуын қамтамасыз ету жөніндегі Ресейдің әрекетін қолдайтынын жеткізді. Көшбасшылар бірлескен іс-қимылды жалғастыруға, соның ішінде экономикалық даму мен көлік инфрақұрылымын қалпына келтіру мүдделері үшін өзара дайын екендіктерін білдірді”, – делінген хабарламада.
Сириядағы жағдайды реттеу мәселелері бойынша Ресей мен Түркия әскери күштерінің Идлиб пен елдің солтүстік-шығысындағы шиеленістің ушығуын болдырмауға, осы аудандарда қалған террористік топтарға қарсы күреске бағытталған бірлескен қызметінің маңыздылығын атап өткен.
Владимир Путин АҚШ президенті Джо Байденмен Женевадағы келіссөздері туралы әсерімен бөлісіпті.
