Ақтөбе облысында хромтаулық фельдшерлер Бауыржан Құдияров, Сая Рысбай, Қайрат Төлеу марапатталды.
Ақтөбе облысының әкімі Самара-Шымкент тасжолындағы жағдайды бағамдау үшін жолға шығып, Хромтау ауданына барды. Қазіргі кезде мұнда бір бағытта ғана жеңіл көліктің жүруіне рұқсат етілген. Ал жүк көліктері жол толық тазартылғанда ғана жіберіледі. Ауданға сапарында Асхат Шахаров қызметіне адалдық танытып, әлеуметтік желі жұлдыздарына айналған фельдшерлерді марапаттады. Бауыржан Құдияров, Сая Рысбай, Қайрат Төлеуге алғыс хат табыстады. Адамдардың өмірін сақтап қалуды көздеген мамандардың еңбегі міндетті түрде еленетінін жеткізді.
“Біз белгіленген жерге кешігіп жатсақ, диспетчерлерге дәлел ретінде бейнежазба жазып жібереміз. Науқасқа барып, жұмысқа қайтып келсек, әлеуметтік желілерде әлгі видеомыз тарап кеткен”, – дейді фельдшер Бауыржан Құдияров.
View this post on Instagram
Еске салайық, Хромтау ауданының жедел жәрдем фельдшерлері 7 ақпан күні жүрегі сыр берген науқасқа барды. Олар жарты жолда көшені қар басқанын көріп, әрі қарай жаяу жүруге мәжбүр болды. Осы аралықта омбылап, жылдам жету қиындағанын көрсету үшін аға фельдшер Сая Рысбай видеоға түсіріп, оны дәлел ретінде ұсынды. Кейін бұл видео желіге тарап, көпшілік қолдауына ие болды.
