Шымент қаласында карантин шектеулері 11 қаңтарға дейін ұзартылды. Бұл туралы қаланың санитарлық-эпидемиологиялық департаменті хабарлады.
Қаланың бас санитар дәрігері “Шымкент қаласының аумағында карантиндік шектеу шараларын ұзарту туралы” қаулы шығарған.
Қаулыда, Шымкент қаласының аумағында 2020 жылғы 21 желтоқсан сағат 00:00-ден бастап 2021 жылғы 11 қаңтар сағат 00:00-ге дейін карантин және шектеу шаралары ұзартылды:
- Жұмыс уақытын барынша қысқарту, кеңсе қызметкерлерінің 50%-ын қашықтықтан жұмыс істеуге көшіру қажет;
- Сауда орталықтарында, азық-түлік және басқа да дүкендерде, халыққа қызмет көрсету саласындағы нысандарда және адамдар көп жиналатын орындарда күнделікті дезинфекциялық жұмыстар жасалуы керек;
- Сауда-ойын сауық орталықтары, сыйымдылығы 30% аспайтын сауда үйлері, бір келушіге 4 шаршы метрден кем емес арақашықтықты сақтаумен жұмыс күндері сағат 09:00-ден 23:00-ге дейін, демалыс және мереке күндері 09:00-ден 22:00-ге дейін жұмыс істей алады;
- Жұмыс, демалыс және мереке күндері қоғамдық көліктердің қозғалысына сағат 07:00-ден 23:00-ге дейін рұқсат.
Еске салайық, керісінше Қарағанды облысында шектеу шаралары жеңілдетілген болатын. Облыста 18 желтоқсан 00.00-ден бастап санитарлық бекеттер алынады. Бекеттер облысқа кіріп-шығуды бақылау үшін қойылған болатын.
Бұған дейін “қызыл” аймаққа Нұр-Сұлтан қаласы кірген, енді Атырау облысы да осы тізімге қосылды.
