Мәжілістің жалпы отырысында кейбір конституциялық заңдарға түзетулер енгізуге қатысты заң жобасын талқылау барысында республикалық бюджет қаржыларын қатаң бақылау жағдайы сөз етілді, деп хабарлайды ҚР Парламент Мәжілісінің баспасөз қызметі.
Заң жобасы аясында «Астана» халықаралық қаржы орталығына бөлінген республикалық бюджет қаржыларын тиімді және мақсатты түрде пайдалану тәртібі АХҚО Басқармасы мен Қаржы министрлігінің бірлескен актісі бойынша анықталатыны көзделген.
Осыған орай депутат аталған орталық қызметінен бөлінетін мемлекеттік қаржыны бақылау жайына алаңдаушылық білдірді.
Осы ретте Мәжіліс Төрағасы Нұрлан Нығматулин АХҚО өкіліне қарата: – ешкімде әсіресе, АХҚО орталығы басшылығында орталықтың өз бетінше қызмет етуіне мүмкіндік беру, мемлекеттен бөлінген қаржыны бақылау жауапкершлігінен босатады деген ой болмауға тиіс. Орталыққа бөлінген қаржының мақсатты пайдалануы үнемі Есеп комитетінің бақылауында,-деді.
Айта кету керек, «Қазақстан Республикасының кейбір конституциялық заңдарына өзгерістер мен толықтырулар енгізу туралы» заң жобасы сот жүйесі, мемлекеттік рәміздер, Конституциялық кеңес, «Астана» халықаралық қаржы орталығы қызметінің мәселелері бойынша заңнаманы одан әрі жетілдіру мақсатында әзірленді.
