Мектеп бітіруші түлектер үшін ең жауапты кезеңдердің бірі – Ұлттық бірыңғай тестілеу. ҰБТ – жоғары оқу орнына түсуге мүмкіндік беретін маңызды емтихан ғана емес, оқушының көп жылғы еңбегінің нәтижесін көрсететін сынақ.
Көптеген оқушылар ҰБТ-ны үлкен қобалжумен күтеді. Жоғары балл жинау, мемлекеттік грантқа түсу және ата-ананың үмітін ақтау – олардың басты мақсаты. Алайда осы жауапкершілік кейде психологиялық ішкі қысымға айналады. Кейбір түлектер өз мүмкіндігін төмен бағалап, қатты күйзеліске түседі.
Шын мәнінде, ҰБТ-ға дайындық тек кітап оқумен шектелмеуі керек. Уақытты дұрыс жоспарлау, уақытылы демалу, денсаулыққа көңіл бөлу және өзіне сенімді болу да жоғары нәтиже көрсетуге көмектеседі. Ата-аналар мен мұғалімдердің қолдауы да бұл кезеңде ерекше маңызды.
Сонымен қатар қоғамда «ҰБТ – өмірдегі жалғыз мүмкіндік» деген қате пікір кездеседі. Егер нәтиже күткендей болмаса да, адам өз мақсатына басқа жолмен жете алады. Бастысы – білім алуға деген ұмтылыс пен еңбекқорлық.
Қорытындылай келе, ҰБТ – болашаққа бастар маңызды баспалдақ. Бірақ адамның жетістігі тек бір емтиханмен өлшенбейді. Нағыз табыс үздіксіз білім алуға, табандылыққа және өз мақсатына адал болуға байланысты.
Исламбек Нұрұмғали, 11-сынып оқушысы
