Қоғам дамыған сайын адамдардың көзқарасы мен өмір сүру салты да өзгереді. Мұндай өзгерістер ең алдымен отбасы ішіндегі қарым-қатынасқа әсер етеді. Әсіресе, жастар мен ата-ана арасындағы түсініспеушіліктер бүгінгі күннің өзекті мәселелерінің біріне айналып отыр.
Жастар – жаңашылдыққа ұмтылатын, еркін ойлайтын буын. Олар өз пікірін ашық айтып, өмірлік таңдауын өз бетінше жасағысы келеді. Ал ата-аналар, керісінше, өмірлік тәжірибесіне сүйеніп, баласының қауіпсіз әрі тұрақты жолды таңдағанын қалайды. Осы екі түрлі көзқарас кейде қақтығысқа әкеледі. Мысалы, мамандық таңдау немесе бос уақытты өткізу сияқты мәселелерде пікір қайшылығы жиі байқалады.
Кейбір ата-аналар баласының ойын толық тыңдамай, өз шешімін дұрыс деп санап ұсынады. Ал жастар мұны түсінбеушілік немесе сенімсіздік ретінде қабылдайды. Нәтижесінде арада реніш пайда болып, ашық әңгіме азаяды. Шын мәнінде, екі тарап та бір-біріне жамандық ойламайды: ата-ана баласының болашағына алаңдайды, ал бала өз мүмкіндігін дәлелдеуге тырысады.
Дегенмен, кез келген мәселенің шешімі бар. Ең бастысы – өзара құрмет пен түсіністік. Ата-ана баласының пікірін тыңдап, сенім мен қолдау білдірсе, арада берік байланыс қалыптасады. Сол сияқты жастар да ата-анасының ақылын ескеріп, өмірлік тәжірибесіне құрметпен қарауы тиіс.
Қорытындылай келе, жастар мен ата-ана арасындағы келіспеушіліктер – табиғи құбылыс. Алайда оны ушықтырмай, ашық диалог пен өзара түсіністік арқылы шешу – әр отбасының қолында.
Әминай Тұрар, 11-сынып оқушысы
