Уақытты дұрыс басқару – жай ғана жоспар құру емес, ол – өмірді саналы түрде ұйымдастыру өнері. Әр адамға тәулігіне 24 сағат берілгенімен, барлығы бірдей сол уақытты тиімді пайдалана алмайды. Біреулер бәріне үлгеріп, мақсатына жетіп жатса, енді біреулер уақыттың қалай өткенін аңғармай қалады. Мұның басты себебі – уақытты басқару мәдениетінің қалыптасу деңгейінде.
Уақытты тиімді пайдалану ең алдымен өз құндылықтарыңды айқындаудан басталады. Адам өзі үшін ненің маңызды екенін білмесе, оның уақыты да жүйесіз өтеді. Сондықтан алдымен қысқа және ұзақ мерзімді мақсаттарды нақтылап алу қажет. Нақты мақсат – дұрыс бағыттың кепілі.
Келесі қадам – жоспарлау. Жоспар – уақытты тиімді пайдаланудың негізгі құралы. Күндік және апталық жоспар құру арқылы адам өз міндеттерін реттеп, маңызды істерге басымдық бере алады. Әсіресе күрделі тапсырмаларды кейінге қалдырмай, алдымен орындау өнімділікті арттырады әрі жауапкершілікті күшейтеді.
Сонымен қатар, уақытты басқару өнері өзін-өзі тәртіпке шақырумен тығыз байланысты. Қазіргі заманда назарды бөлетін факторлар өте көп: әлеуметтік желілер, ойын-сауық, артық әңгімелер. Егер адам өз назарын басқара алмаса, уақытын да тиімді пайдалана алмайды. Сондықтан белгілі бір уақыт аралығында бір ғана іске шоғырлану – нәтижелі еңбектің басты кепілі.
Қорытындылай келе, уақытты дұрыс басқару – табысқа жетудің маңызды шарты әрі өмірді саналы ұйымдастырудың көрінісі. Уақытты бағалай білген адам өз болашағын да бағалайды. Әрбір сәт – жаңа мүмкіндік. Ал сол мүмкіндікті тиімді пайдалану – әр адамның өз қолында.
Әминай Тұрар, 11-сынып оқушысы
