Жаңа оқу жылында 1-11 сынып оқушылары қашықтан оқиды. Бұл туралы 14 шілде күні баспасөз жиынын өткізген білім және ғылым министрі Асхат Аймағамбетов айтты.
Министрдің хабарлауынша, денсаулық сақтау министрлігі ұсынған соң, үкімет қиын да болса осындай шешім қабылдаған. Дегенмен шағын ауылдың оқушылары мектепке барып оқи алады.
“Шалғайдағы қауіп жоқ өңірлерде орналасқан шағын мектептерде әдеттегідей дәстүрлі оқуды ұйымдастыруға мүмкіндік беріп отырмыз. Бұдан бөлек, бастауыш сыныптағы оқушылардың ата-анасы қаласа, уақытша сыныптар ашуға дайынбыз. Мұнда балалар бірнеше ауысымға бөлініп оқиды. Санитарлық талап барынша қадағаланады” деді министр.
Аймағамбетов балалардың мектепке баруы кезең-кезеңмен жүзеге асырылады деді.
Қазақстан оқушылары пандемия кесірінен көктемгі демалыстан кейін мектепке барған жоқ. Министрдің айтуынша, наурыз-мамыр айларындағы қашықтан оқу процесінде мұғалімдер тәжірибе жинаған. Енді жаңа оқу жылына видеодәрістер, интернетте білім ресурстары әзірленіп, мектептер техникамен толықтырылып жатыр.
“Қазір мектептерде бір компьютерге жиырма баладан келеді. Біздің алдымыздағы мәселе – бес балаға бір компьютер көрсеткішіне жеткізу. Бұған дейін білім министрлігі дүниежүзілік банктен қаржы сұраған. Ол келесі жылы бөлінеді деп жоспарланған. Бірақ біз қаржыны қазір беруін сұрап отырмыз. Егер келіссе, жаңа оқу жылына дейін мектептерге компьютер аламыз” деді министр.
