АҚШ президенті Дональд Трамп әкімшілігі сайлаудан бері үш апта өткен кезде Джо Байден командасына билікті тапсыруға келісті.
Дональд Трамп сайлауда жеңілгенін нақты мойындаған жоқ, бірақ федералдық агенттіктің билік транзитін бастау туралы шешімімен келісетінін айтты.
Бұған дейін жалпы қызмет әкімшілігінің (General Services Administration) жетекшісі Эмили Мерфи 20 қаңтарда инаугурациясы өтетін Байденге билік тапсыру процесін ресми түрде бастай беруге болатынын ескерткен.
“Мемлекеттің мүддесі үшін Эмили және оның командасына бастапқы протоколға сәйкес атқарылуы тиіс шараларды жүзеге асыруға кеңес беремін және өзімнің командама да соны айттым” деп жазды Трамп Twitter желісінде.
…fight, and I believe we will prevail! Nevertheless, in the best interest of our Country, I am recommending that Emily and her team do what needs to be done with regard to initial protocols, and have told my team to do the same.
— Donald J. Trump (@realDonaldTrump) November 23, 2020
Жалпы қызмет әкімшілігінің қадамы Байден командасына федералдық агенттіктердің ақпаратына қол жеткізіп, ресми тұлғалармен байланыс орнатуға, билік ойдағыдай ауысу үшін үкіметтен қаржы алуға мүмкіндік береді.
Билік транзитін бастаудан бас тартып келген Трампқа осыған дейін демократтар мен бірқатар республикашылдар процесті кешіктірмеу қажеттігін меңзеп, қысым жасаған. Билік транзитінің кешігуі коронавирус індетімен күреске және ұлттық қауіпсіздік мәселелеріне теріс ықпал етуі мүмкін екені де айтылған еді.
Джо Байден командасы кешігіп жеткен үкімет көмегін жылы қабылдап, бұл қадам “биліктің бейбіт ауысуы үшін” өте маңызды екенін жеткізді.
