Қазіргі қарқынды дамып жатқан заманда әлемдік экономика, экология және технология салалары үздіксіз өзгеріске ұшырауда. Бұл өзгерістер еңбек нарығындағы сұранысқа айтарлықтай әсер етеді. Сәйкесінше, бүгін ойымызға да келмейтін «жаңа мамандықтардың» алдағы уақытта сұранысқа ие болуы әбден мүмкін.
Мамандар мен сарапшылардың болжамына сәйкес, алдағы 10–15 жылда төмендегі мамандықтар ерекше сұранысқа ие болады:
Жасанды интеллект және IT саласы:
2035 жылға қарай ең үлкен сұранысқа ие бағыттардың бірі — IT саласы болмақ. Себебі көптеген кәсіпорындар автоматтандыру жүйесіне көшеді. Осыған байланысты AI-инженерлер, киберқауіпсіздік мамандары, бағдарламалаушылар және робототехника инженерлері сияқты мамандарға қажеттілік артады.
Биотехнология және медицина:
Аурулардың алдын алу, жаңа дәрі-дәрмектерді ойлап табу және генетикалық зерттеулер жүргізу — болашақтың негізгі бағыттарының бірі. Халық санының өсуі, түрлі жаңа аурулар мен вирустардың пайда болуы бұл салаға деген сұранысты күшейтеді. Сонымен қатар қашықтан емдеу мен заманауи медициналық технологияларды қолданатын жаңа кәсіптер қалыптасады.
Жасыл энергетика және экология:
Экологиялық мәселелер мен климаттың өзгеруі «жасыл энергетика» саласындағы мамандықтардың маңызын арттыра түседі. Экологиялық проблемалар — әлем үшін ең өзекті мәселелердің бірі. Оларды шешу жолында экологиялық инженерия, экологиялық менеджмент сияқты бағыттарда жаңа жұмыс орындары ашылады.
Шығармашылық және гуманитарлық бағыт:
Роботтар көптеген техникалық жұмыстарды атқара алғанымен, шығармашылық ойлау, эмоциялық интеллект және адамға тән сезімді толықтай алмастыра алмайды. Дизайн, журналистика, психология, актерлік өнер, әншілік сияқты салаларда нақты адаммен және көрерменмен жұмыс істейтін мамандар әрдайым қажет болады.
Білім және педагогика саласы:
2035 жылға қарай кәсіби қайта даярлау, онлайн оқыту және цифрлық білім беру технологиялары кеңінен дамиды. Сондықтан онлайн-тренерлерге, заманауи педагогтарға және білім беру технологиялары саласының мамандарына сұраныс артады.
Қорытындылай келе, 2035 жылы сұранысқа ие мамандықтар тек бір ғана саламен шектелмейді. Ең бастысы — жаңа технологияларды меңгеру, өз қабілетіңді дамыту және біліміңді үнемі жетілдіріп отыру. Болашақ мамандық — бұл жай ғана таңдау емес, ол үздіксіз даму үдерісі.
Айдидар Нүркен
