Әлемге танымал Oxford University Press баспасы қостілді OXFORD QAZAQ DICTIONARY сөздігін басып шығаруға ресми рұқсатын берді. Бұл жөнінде “Ұлттық аударма бюросы” ҚҚ атқарушы директоры Рауан Кенжеханұлы әлеуметтік желіде жазды.
60 мың сөзді қамтыған, жалпы көлемі 1300 беттік қазақша-ағылшынша және ағылшынша-қазақша ОКСФОРД сөздігінің тұңғыш басылымын Қазақстан президенті Қасым-Жомарт Тоқаевтың тапсырмасымен “Ұлттық аударма бюросы” дайындаған.
“Сөздікті әзірлеуде дүние жүзіне танымал OXFORD ENGLISH DICTIONARY сөздігін құрастыру әдістемесі мен технологиясы негізге алынды. Сөздік құрастыру жұмысы төрт жыл үздіксіз жүріп, оған қазақ және ағылшын тілінің лексикасына маманданған 50-ден аса тәжірибелі тілші атсалысты. Сөздікті жетілдіруге Ахмет Байтұрсынұлы атындағы Тіл білімі институтының мамандары қатысып, сөздік институт ғылыми кеңесінің сараптамасынан өтті”, – дейді Рауан Кенжеханұлы.
Сөздікті құрастыру аясында қазақ және ағылшын тілі лексикасындағы өзгерістер, әсіресе қазіргі мәдениет, ақпараттық технологиялар, медицина, экономика, қаржы мен сауда салаларындағы жаңалықтар ескерілген. Сондай-ақ, сөздікте ағылшын және қазақ тілдерінің грамматикасы мен дыбыстау, емле ережелері түсіндірілетін қысқаша нұсқаулықтар, қазақ тіліндегі іскерлік және электронды хат-хабар жазу үлгілері берілген.
Айта кетейік, осы сөздік негізінде қазақ тілі Oxford Global Languages платформасына қосылады. Бұл бастаманың мақсаты – әлемнің ірі де, іргелі 100 тілінің лексикалық қорын өзара байланыстырып, ортақ ғаламдық тіл корпусын жасақтау. Кенжеханұлы ол туралы кеңінен қосымша хабарлайтынын айтты.
“Қазақ тілін әлемдегі ең танымал әрі ең беделді сөздіктер желісімен байланыстырып, ғаламдық лингвистикалық ортаға қосатын бұл сөздік ана тілімізді қолдау және заманға сай дамыту жолындағы үлкен қадам деп білеміз. Осы маңызды жобаға қолдау білдірген президент Қ.К.Тоқаевтың тапсырмасына сәйкес, сөздік кең көлемде басылып, еліміздің оқу орындары мен кітапханаларына таратылады. Осы жобаға қатысып, аса ауқымды да күрделі жұмысқа атсалысқан барша әріптестерімізге алғыс айтамыз”, – деді “Ұлттық аударма бюросының” атқарушы директоры.
