Президент Тоқаев қазақстандықтарды Ораза айт мерекесімен құттықтады

0
102
Қазақстан президенті Қасым-Жомарт Тоқаев. Photo: akorda.kz

21 сәуір күні барша мұсылман Ораза айт мерекесін тойлап жатыр. Мемлекет басшысы осы күні қазақстандықтарды мерекемен құттықтады, деп хабарлайды Kazaknews.kz тілшісі.

Төменде президент құттықтауының толық мәтіні:

Қадірлі отандастар!

Баршаңызды Ораза айт мерекесімен шын жүректен құттықтаймын!

Бұл – күллі мұсылман қауымының ұлық мейрамы. Ораза ұстаған жамағат осы мерекені асыға күтеді. Алыс-жақын ағайын бір-бірінің үйіне барып, жылы лебізін білдіреді. Халқымыздың ынтымағы нығайып, бірлігі беки түседі.

Ислам – имандылықты, бейбітшілікті, мейірімділікті дәріптейтін асыл дін. Осы игі құндылықтар елдің амандығы мен берекесін тілейтін ұлтымыздың салт-дәстүрімен біте қайнасып жатыр. Сондықтан бұл – бір шаңырақта тату-тәтті өмір сүріп жатқан барша жұртымыз үшін қадірлі ұғымдар.

Ораза айт – елдігімізді еселейтін мереке. Біз мемлекетіміздің жарқын болашағы үшін қоғамдағы бірлік пен келісімді одан әрі нығайта береміз.

Еліміздің әр шаңырағы бақыт пен қуанышқа бөленсін!
Халқымыздың ырысы мен ынтымағы арта берсін!

Айт қабыл болсын, ағайын!

ЖАУАП ҚАЛДЫРУ

Пікіріңізді енгізіңіз!
Мұнда аты-жөніңізді енгізіңіз