Министр: дума депутаттарының мәлімдемесі Ресейдің ресми ұстанымы емес

0
241
Қазақстан сыртқы Астер министрі Мұхтар Тілеуберді.

23 желтоқсанда Қазақстан сыртқы істер министрі Мұхтар Тілеуберді Ресей думасының депутаттары Вячеслав Никонов пен Евгений Федоровтың Қазақстан аумағы туралы айтқандары – Ресейдің ресми ұстанымы емес деп мәлімдеді.  

Желтоқсанның басында Ресей мемлекеттік думасының екі мүшесі Қазақстанға қазіргі жерін Ресей сыйлаған деп мәлімдеген еді.

– Федоров сөзіне келсек, қазақ ретінде, қазақстандық ретінде бұл намысыма қатты тиеді. Оларға орысша жауап берсем “это бред сивой кобылы!” (бос сөз). Мұндай мәселелер көтерілген кезде бірінші кезекте тарихшылар, ғалымдарға сүйенуіміз керек, – деді министр Тілеуберді.

Министрдің сөзіне қарағанда, “депутат Никоновтың сөзінен кейін Қазақстан сыртқы істер министрлігі Ресейдің уақытша өкілін шақырған, себебі ол кезде Ресей елшісі Мәскеуде іссапарда жүрген”.

– Ресейдің уақытша өкілін орынбасарым қабылдады. Оған нота тапсырып, сыртқы істер министрлігінің ресми ұстанымын жеткіздік. Қолда бар тәжірибеге сүйенсек, олар ресми түрде жауап бермейді, бірақ бізге қабылданған шаралар туралы хабарлады. Олар парламент, президент әкімшілігімен хабарласып, мұндай сөздер айтуға болмайтынын айтып ескерткен. Сыртқы істер министрі ретінде айтарым, бұл – сөзсіз, Ресейдің ресми ұстанымы емес, – деді сыртқы істер министрі.

Ресей мемлекеттік думасының білім және ғылым комитетінің жетекшісі, биліктегі “Единая Россия” партиясы фракциясының мүшесі Вячеслав Никонов 10 желтоқсанда ресейлік “Первый канал” телеарнасындағы “Большая игра” бағдарламасында “Қазақстан аумағы – Ресейдің Қазақстанға берген үлкен сыйы” деп мәлімдген. Ізінше мемлекеттік дума депутаты Евгений Федоров “Қазақстанмен біртұтас мемлекетті қалпына келтіру” туралы айтқан.

Кейбір қазақстандық сарапшылар мұндай сөз тегін айтылған жоқ, артында үлкен күштер тұр деп санайды.

ЖАУАП ҚАЛДЫРУ

Пікіріңізді енгізіңіз!
Мұнда аты-жөніңізді енгізіңіз