Түркияда күні кеше мерзімінен бұрын өткен сайлаудың ресми қорытындылары жарияланбағанмен, оппозиция өкілдерінің наразылығы толастар емес. Олар бір ауыздан Анадолу агенттігі манипуляция жасағанын айтады.
Еуроньюс агенттігінің хабарына сүйенсек, оппозициялық Халық-республикалық партиясының (CHP) өкілі Бюлент Тезджан про-үкіметтік Анадолу агенттігінің манипуляция жасағанын мәлімдей келе, негізінде, президенттік сайлаудың екінші турға қалғанын айтты.
Оның сөзінше, Жоғары сайлау комиссиясы ұсынған көрсеткіштерде Режеп Тайып Ердоған (биліктегі Әділет және даму партиясының (АКР) басшысы) 44%, ал Мухаррем Индже (CHP үміткері) 40% дауыс жинаған.
Бюлент Тезджан өз кандидаттарының нәтижелері әлі жарияланбаған Стамбул, Анкара, Измир, Мерсин және Адана секілді ірі қалаларда көпшіліктің сеніміне ие болатынына сенімді.
Оппозиция өкілі Анадолу агенттігін меңзеп, «біреулер мерзімінен бұрын тойлауды бастап кеткенін» жеткізді. Шынтуайтында, президенттік сайлау екінші турға қалғалы жатқан.
-«Индже фаворит болған қалалар соңына қалдырылды»
Халық-республикалық партиясының басқа бір өкілі Айкут Ердогду да әріптесінің пікірін қостады. Твиттер желісінде жариялаған хабарында Ердогду:
Anadolu Ajansı’nın açıklamalarında Muharrem İNCE’nin en güçlü olduğu sandıklar en sona bırakıldı… Bu seçim ikinci tura kalacak… Seçim sonuçlanmadan yapılacak balkon konuşmaları seçim hilesinin başka bir hamlesi olacak… Islak imzalı sandık tutanaklarının peşinde olun…
— Aykut Erdoğdu (@aykuterdogdu) 24 Haziran 2018
«Анадолу агенттігінің мәлімдемелерінде Мухаррем Индже ең мықты боп саналатын сандықтар (сайлау жәшіктері орналасқан қалалар –ред.) соңына қалдырылды… Бұл сайлау екінші турға қалады… Сайлау нәтижеленбей тұрып жасалынғалы жатқан балконға шығулар (соңғы 3-4 жылда Режеп Тайып Ердоған сайлау бітпей жатып партияластарымен президенттік сарайдың балконға шығып, жеңіс сөзін сөйлеуді әдетке айналдырған –ред.) сайлау айлаларының басқа бір қадамы болады… Мөрінің сиясы кеппеген жәшіктерден көз жазбаңдар…», – деп мәлімдеме жасады.
-«Анадолу агенттігі баяғы әдетіне салып, манипуляциялауды жалғастыруда»
Халық-республикалық партиясының тағы бір өкілі, партияның Стамбул аумағы басшысы Джанан Кафтаноглу сайлау нәтижелері туралы мынадай мәлімдеме жасады:
«Анадолу агенттігі, баяғы әдетіне салып, манипуляция жасауын жалғастыруда. Анатолияның шағын қалаларының дауыстары саналды. Үлкен қалаларда сандықтар ашылмады. Қорқудың ажалға пайдасы жоқ. Соңғы күлген жақсы күледі. Бірнеше сағаттан кейін жоғалтқандарына қарамастан, нақты нәтиже келгенде, әлі-ақ біздің жүзіміз жайнайды. Бірнеше сағаттан кейін тағы да кездесеміз. Деректеріміз Жоғары сайлау комиссиясынікіне параллель. Сандықтарды күзеткендер таң атқанша орындарын тәрк етпесін.»
-«Жақсы партияның» басшысы Мерал Акшенер де «манипуляция болды» дейді
Соңғы сайлауда Халық-республикалық партиясымен бірге Халық коалициясын құрған «Жақсы партияның» басшысы Мерал Акшенер де Анадолу агенттігінің манипуляция жасағанын меңзеді. Жақтастарына қарата айтқан сөзінде партия төрайымы ақпарат агенттігінің манипуляцияларына бой бермей, сандықтарға ие болуға шақырды.
Твиттер арқылы хабар жолдаған Акшенер:
Görevli ve müşahit kardeşlerim, sandıklarımızdan ayrılmıyoruz! AA’nın manipülatif sonuçlarından bağımsız, sandıklara son ana kadar sahip çıkıyoruz! Islak imzalı ve mühürlü nüshaları alana kadar sandık başında bekliyoruz!
— Meral Akşener (@meral_aksener) 24 Haziran 2018
«Жауапты және бақылаушы бауырларым, сандықтарымыздан ажырамаймыз! Анадолу агенттігінің манипулятив нәтижелеріне мойын сұнбай, сандықтарға соңғы сәтке шейін ие боламыз! Қолы және мөрі кеппеген нұсқаларды алғанша, сандықтың басында күтеміз.» – деп үндеу тастады.
Анадолу агенттігі – 1920 жылы құрылған мемлекеттік ақпарат агенттігі. Оппозиция өкілдерінің агенттікке деген наразылығы – елдегі тәуелсіз ақпарат құралдарының жабылуының көрінісі. Осыған дейін демократияның негізгі принциптеріне сай тарапсыз ақпарат таратып келген медиа агенттіктердің негізгі бөлігі 15 шілде 2016 жылғы төңкеріс әрекетінен кейін «лаңкестікке қолдау білдірді» деген желеумен жабылған болатын.
Бауыржан Мұқан
