Қазақстанның бұрынғы денсаулық сақтау министрі Елжан Біртанов “ақша жымқыру” күдігімен ұсталды. Бұл туралы бірқатар жергілікті БАҚ хабарлады.
Баспасөзде тараған ақпаратта, экс-министрді Қаржы министрлігі қаржы мониторингі комитетінің тергеу департаменті ұстаған.
Kaztag агенттігінің хабарлауынша, экс-министр цифрландыруға бөлінген 526 миллион теңге қаржыны талан-таражға салды деген айыппен күддікке ілінген.
Қаржы министрлігі қаржы мониторингі комитеті Азаттық сайтына Біртановқа қатысты тергеу амалдары туралы ақпараттың жариялауға жатпайтынын мәлімдеген.
“Қазақстан Республикасы бұрынғы денсаулық министріне қатысты тергеу амалдары жөніндегі ақпарат қылмыстық процестік кодекстің 201-бабына сәйкес жариялауға жатпайды. Ақпарат болғанда міндетті түрде хабарлаймыз” деді қаржы комитеті БАҚ-пен жұмыс істеу басқармасының жетекшісі Арман Жүнісов.
49 жастағы Біртанов маусым айының соңында, елде коронавирус індеті ушығып тұрған сәтте отставкаға кетті. Соның алдында оның коронавирус ауруына шалдыққаны хабарланған. Экс-министр отставкаға кетуін аурудан толық емделу қажеттігімен түсіндірген. Алайда Қазақстан президенті Қасым-Жомарт Тоқаев 8 шілдедегі мәлімдемесінде денсаулық сақтау министрлігінің бұрынғы басшылығын қатаң сынға алды.
Президент коронавирус пен ауру белгілері бойынша соған ұқсайтын пневмония ауруының өршуін Біртанов басқарған мекеменің жүйелі қателігінен болды деп, сол қателіктерді тексеру бойынша арнайы комиссия құруды тапсырды.
Артынша министрлікке бағынышты ұйымдар – “СК-Фармация” компаниясының басшысы Берік Шәріп пен бұрынғы денсаулық сақтау вице-министрі Олжас Әбішев ұсталған.
Осыдан кейінгі айларда денсаулық сақтау министрлігінде Біртановтың жетекшілігінде жұмыс істеген вице-министр Людмила Бюрабекова да отставкаға кетті.
Елжан Біртанов денсаулық сақтау министрі болып 2017 жылдың 25 қаңтарында тағайындалған. Оның алдындағы екі жылда ол осы мекемеде вице-министр болып жұмыс істеді. Біртанов денсаулық сақтау вице-министрі қызметін 2008-2010 жылдары да атқарған. Одан кейін квази-мемлекеттік секторда жетекшілік қызметте болған.
