ҚР Ұлттық академиялық кітапханасы 2016 жылдан бастап шет мемлекеттердің Ұлттық кітапханаларында Қазақстан әдебиеті мен мәдениеті орталығын ашу жобасын қолға алған. Қазіргі таңда бұл орталық әлемнің Қытай, Корея, Жапония және Италия сынды 17 мемлекетінде жұмыс істейді.
Еgemen.kz-тің мәліметінше, 2018 жылдың 19-23 қаңтар аралығында АҚШ Конгресс Кітапханасы мен Нью-Йорк қаласындағы көпшілік кітапханасына Қазақстан жайында кітап тапсыру және Қазақстан әдебиеті мен мәдениет орталығының салтанатты түрде ашылуы өтеді. Осы іс-шара мемлекет басшысы Нұрсұлтан Әбішұлы Назарбаевтың Америка Құрама Штаттарына (АҚШ) ресми сапары аясында жүргізіледі.
Іс-шара Қазақстан Республикасының АҚШ-тағы Төтенше және Өкілетті Елшісі Ержан Хозеұлы Қазыханов, Қазақстан Республикасының Нью-Йорк қаласындағы Бас консулы Әбдрашов Жәнібек Жарасқанұлы, АҚШ Конгресс Кітапханасы мен Нью-Йорктік көпшілік кітапханасының Бас директоры Энтони Маркс, қоғамдық және шығармашылық зиялы қауым, студенттер мен Қазақстанның Нью-Йорк қаласындағы Ұлттық-мәдени Орталығындағы қазақстандық диаспора өкілдерінің қатысуымен өтеді.
Қазақстан әдебиеті орталығының ашылуы АҚШ астаналық орталық кітапханасы оқырмандарына қазақ халқының салт-дәстүрі, мәдениеті, өнерімен жақын танысуға мүмкіндік береді. Бұл Тәуелсіз Қазақстанның жетістіктері мен оның экономика, саясат, әлеуметтік салалардағы табыстарын көпшілікке таныстыруға жол ашады.
АҚШ-тың Конгресс кітапханасы мен Нью-Йорк қаласының көпшілік кітапханасы әлемнің үздік ғылыми кітапханалары болып табылады, бай тарихымен және салт-дәстүрімен, бірегей, раритеттік басылымдармен, қорлары арқылы бүкіл әлем мен кеңістіктегі оқырмандарға қызмет көрсете алады.
Орталықта Қазақстан Республикасының Президенті Нұрсұлтан Әбішұлы Назарбаевтың, соның ішінде, Елбасының әлемдік саяси аренадағы орны мен рөліне арналған кітаптары, тарих, ғылыми-көпшілік және көркем әдебиеті бойынша кітаптар ұсынылады. Барлығы 400 ден астам кітап тапсырылады. Бұл кітаптар американдық оқырмандары арасында үлкен қызығушылыққа ие болып, қазақтың бай мәдени мұрасын тануға мүмкіндік берері сөзсіз.
Еске сала кетейік, осыған дейін Прагада «Қазақстан әдебиеті мен мәдениеті» орталығы ашылған болатын. Бұл орталық Прага қаласындағы екі мыңнан астам қазақ жастарына игі бастамалар әкеліп, Чех халқына қазақ халқының салт-дәстүрі мен мәдениеті және өнерімен жақын танысуға мүмкіндік әкелді.
