Әзербайжан 28 жылдан кейін Шуша қаласын қайтарып алды

0
215
Шуша қаласы.

Өткен жексенбіде Әзербайжан президенті Ильхам Әлиев ел әскерінің Таулы Қарабақтағы екінші үлкен қала – Шушаны бақылауға алғанын айтты. 

“Бұл күн Әзербайжан тарихындағы ерекше күн болады” деген Әлиев қарулы күштердің Шушаны бақылауға алғанын хабарлады.

Ел астанасында жұрт жиналып, оқиғаны тойлап жатыр. Көшеде ұлттық жалауды желбіретіп, ұрандатып жүргендер, көліктерінің сигналын басып жатқандар көп.

Мойындалмаған Таулы Қарабақ аймағының басшылығы және Арменияның қорғаныс министрлігі Әлиевтің ақпаратын жоққа шығарды.

Түркия билігі Әзербайжанды осы оқиғамен құттықтады.

“Әзербайжан бауырларымды Шушадағы жеңісімен құттықтаймын. Бұл оккупацияланған жердің қалған бөлігі де жуық арада қайтарылады деген сөз” деді Түркия президенті Режеп Тайып Ердоған елдің солтүстік-батысындағы Кожаели аймағында жиналған жұрт алдында сөйлеген сөзінде. 

Әзербайжан Оңтүстік Кавказдағы 25 жылдағы ең қанды соғыста бір айдан астам уақыт ішінде Таулы Қарабақ пен оның маңайындағы жердің біразына бақылау орнатты. 1990 жылдардағы соғыста Баку бұл жерден айрылып қалған еді.

Әзербайжандар “Шуша”, армяндар “Шуши” деп атайтын бұл қала аймақ орталығы Степанакерттен оңтүстікке қарай 15 километр жерде орналасқан.

Шуша екі халық үшін де мәдени әрі стратегиялық маңызы бар орталық саналады. Мұнда екі халықтың да тарихи, діни жәдігерлері орын тепкен. Соғысқа дейін Шуша тұрғындарының көпшілігі әзербайжан болған.

Халықаралық деңгейде Әзербайжанның жері болып саналатын, көбіне армяндар қоныстанған Таулы Қарабақ аймағында ұрыс қайта басталған алты апта ішінде мыңға жуық адам қаза болған.

ЖАУАП ҚАЛДЫРУ

Пікіріңізді енгізіңіз!
Мұнда аты-жөніңізді енгізіңіз