Нан бағасы бір жылда 19% қымбаттады. Бір облыста бағаның өсімі 48%-ға дейін барды. Тиісінше өндіріс азайған, деп хабарлайды Kazaknews.kz тілшісі energyprom.kz сайтына сілтеме жасап.
Биыл қаңтар–тамыз айларында жаңа піскен нан өндірісі 342,4 мың тоннаны құраған. Бұл өткен жылдың сәйкес кезеңімен салыстырғанда 3%-ға аз. Өндірілген өнімнің төрттен бір бөлігі дерлік Түркістан облысының үлесіне тиген: 81,7 мың тонна. Бұл нәтиже бір жыл ішінде 8,3%-ға азайған. Үздік үштікке Алматы қаласы мен Ақтөбе облысы да кіреді (36,6 мың және 33,8 мың тонна).
Жаңа піскен нан Ұлытау мен Маңғыстау облыстарында және Шымкентте ең аз өндірілген.
Биылғы қыркүйек айында нан бағасы өткен жылдың қыркүйек айымен салыстырғанда 19,4%-ға қымбаттаған. Қара бидай мен бидай ұнынан пісірілген нан 24,7%, жоғары сұрыпты ұннан пісірілген бидай наны 28,2%, бірінші сұрыпты ұннан пісірілген бидай наны 14,4%, кесілген нан 28,1%-ға қымбаттаған. Атап айтқанда Ұлытау облысында бірден 48,3%-ға, Ақмола облысында 27,6% және Алматы қаласында 25,8%-ға қымбаттаған. Баға баяу өскен өңір – Солтүстік Қазақстан облысы. Онда нан бағасы 2,6%-ға ғана өскен.
Жоғары сұрыпты ұннан жасалған бидай нанының килосы 341 теңгеден, бірінші сұрыпты ұн наны 195 теңгеден сатылған.
