Биыл Астанада 5 жаңа автобус бағдары іске қосылады. Бұл туралы елорда әкімдігінің баспасөз қызметі хабарлады.
Астана қалалық көлік және жол-көлік инфрақұрылымын дамыту басқармасы көше-жол желілерін жеңілдету және елорданың қоғамдық көлігін дамыту үшін белсенді көлік саясатын жүргізіп келеді.
«Биыл бағдар желісінің қызмет көрсету аймағын кеңейту үшін жаңа 5 бағдарды іске қосу жоспарланып отыр. Шамамен 200 жаңа автобус сатып алынып, желідегі кесте саны 70-ке артады», – деп атап өтті әкімдік өкілдері.
Әкімдік мәліметінше, қазіргі уақытта көше-жол желісінде қоғамдық көліктерге арналған жолағы 27 учаске бар. Олардың ұзындығы 100 шақырымнан асады.
«2024 жылы Айтматов, Тұран, Ұлы дала, Мәңгілік ел, Тәуелсіздік, Қошқарбаев, Керей-Жәнібек хандар сынды негізді магистралдық көшелерде арнайы жолақтар желісін шамамен 60 шақырымға арттыру көзделіп отыр», – делінген әкімдік жауабында.
