Еңбек кітапшасы электронды форматқа көшеді

0
963
Еңбек кітапшасы

Қазақстанда 2018 жылдың соңына дейін еңбек кітапшалары қолданыстан шығады. Қағаз еңбек кітапшасы электрондық форматқа ауысып, e-HR жүйесі біртіндеп енгізіледі.

2019 жылға қарай жұмысқа орналасу барысында еңбек келісімшарттары онлайн режимде жасалатын болады. «Бүгінде жұмыс беруші мен іздеуші арасында іскерлік қарым-қатынасты осылай рәсімдеу әдісі маңызды, себебі қазір көбі бір-бірімен қашықтықтан әріптестік орнатады. Жақында жұмысқа орналасу үшін жеке куәлік қана керек болады, ал қалған құжаттар базада сақталады», — деді Еңбек және халықты әлеуметтік қорғау министрлігінің баспасөз қызметі.

Баспасөз қызметінің мәліметінше, бүгінгі таңда бұл функция enbek.kz сайтындағы маңызды жаңашылдықтың бірі саналады. Мәселен, электрондық еңбек биржасында цифрлық форматта жұмыскер профилі жүргізіліп, еңбек келісімшарттары бекітіліп отыратын болады. Еңбек министрлігінің өкілдері жұмыс берушілерге электрондық жеке істер қалыптастыруды ұсынып отыр. Адамдар жұмысқа орналасқан кезде құжаттарын ұсынады, онымен қоса, жұмыскерлердің рұқсатымен олардың ЖСН-дерін бірыңғай базаға жіберу ұсынылуда. Мұның нәтижесінде жұмыс беруші куәландырылған электрондық ақпаратты ала алады. Одан кейін жұмыскерлердің құзыретін онлайн-режимде растауға мүмкіндік болады.

ҚР Еңбек және халықты әлеуметтік қорғау вице-министрі Нариман Мұқұшевтің айтуынша, электрондық жүйе қағазбастылықты ұмытып, еңбек кітапшаларынан бас тартуға мүмкіндік береді.

«Нәтижесінде, қазақстандықтар жұмысқа тек жеке куәлігі арқылы орналаса алатын болады. Диплом, медициналық анықтама сияқты басқа қажетті құжаттар мәліметтер базасында тұрады. Сондай-ақ бұл формат жұмыстан шығып қалған адамды электрондық еңбек биржасына автоматты түрде орналастыруға мүмкіндік береді», — деді Мұқұшев.

Биыл пилоттық жоба бүкіл Қазақстан бойынша іске қосылады. Бұл жүзеге асып жатқан жүйенің тиімділігін тексеру үшін қажет. Ал электронды еңбек келісімшарттарын рәсімдеуге 2019 жылға қарай толық көшу жоспарланып отыр.

ЖАУАП ҚАЛДЫРУ

Пікіріңізді енгізіңіз!
Мұнда аты-жөніңізді енгізіңіз