“Жолаушылар тасымалы” АҚ жолаушылар пойызының қозғалыс кестесіне кейбір өзгерістер енгізеді. Бұл туралы ведомство сайты хабарлады.
Сәуірдің бірінен бастап күн ара қатынайтын “Тұлпар-Тальго” вагондары Нұр-Сұлтан-Нұрлы жол стансасынан тақ күндері жөнелтілетін жаңа №19/20 “Нұр-Сұлтан-Нұрлы жол-Атырау” жолаушылар пойызы тағайындалды;
3 сәуірден бастап №54/53 “Нұр-Сұлтан-Нұрлы жол-Достық” бағытындағы жолаушылар пойызының қатынау жиілігі аптасына 2 ретке көбейтіліп, “Нұр-Сұлтан-Нұрлы жол” стансасынан жұма және дүйсенбі күндері жөнелтілетін болады;
№701/702 “Алматы-2-Нұр-Сұлтан Нұрлы жол” бағытындағы “Тұлпар-Тальго” вагондарынан тұратын жолаушылар пойызына қосымша ретінде Алматы-2 стансасынан 2020 жылғы 25, 26, 27, 28, 29, 30 наурызда, ал Нұр-Сұлтан-Нұрлы жол стансасынан 2020 жылғы 26, 27, 28, 29, 30, 31 наурызда жөнелтілетін 6 рейс іске қосылады;
1 сәуірден бастап №321/322 “Алматы-2-Нүкіс” бағытындағы жолаушылар пойызының маршруты Сарыағаш стансасына дейін қысқартылады және Алматы-2 стансасынан тақ күндері жөнелтіліп, күн ара қатынайтын болады;
2 сәуірден бастап №309/310 “Маңғыстау-Ақтөбе” бағытындағы жолаушылар пойызының (тасымалдаушы “Otpan Logistic” ЖШС) және №648/647 “Мискен-Бейнеу” бағытындағы (Өзбек темір жолы құрастырған) жолаушылар пойызының құрамында “Маңғыстау-Нүкіс-Маңғыстау” бағытында тікелей қатынайтын вагондар қатынастан алынып тасталады;
1 сәуірден бастап №393/394 “Алматы-2-Алтынкөл” бағытындағы және №91/92 “Нұр-Сұлтан Нұрлы жол-Қызылорда” бағытындағы жолаушылар пойызы қатынастан алынып тасталады;
№705/706 “Алматы-2-Петропавл” бағытындағы жолаушылар пойызының қатынасы мына күндері: Алматы-2 стансасынан 2020 жылғы 25, 26, 27, 28, 29, 30 наурызда, ал Петропавлдан 2020 жылғы 26, 27, 28, 29, 30, 31 наурызда уақытша тоқтатылады.
