Бүгін Риядта Сауд Арабия Корольдігінің Ислам істері бойынша министрі Шейх Салих бин Абдул Әзиз бин Мухаммед Әл-Шейх Қазақстанның Бас мүфтиі Серікбай қажы Ораз бастаған делегацияны қабылдады. Бұл туралы Қазақстан Мұсылмандары діни басқармасының (ҚМДБ) баспасөз қызметі хабарлайды.
Кездесу барысында Саудия министрі Корольдік пен Қазақстан арасындағы қарым-қатынасты ерекше атап өтті, аталған сапардың қос мемлекеттің арасындағы қарым-қатынасты әрі қарай қуаттай түсетіндігін тілге тиек етті, деп хабарлайды ҚМДБ.
Өз кезегінде, Бас мүфти Серікбай қажы Қазақстан мен Корольдік арасындағы жан-жақты ынтымақтастыққа алғыс білдірді, аталған қатынастардың тас беки түскендігін алға тартты. Бас мүфти Сауд Арабиясы министрін Қазақстанда өтетін «Әлемдік және дәстүрлі діндер лидерлерінің съезіне» қатысуға шақырды.
Бірқатар маңызды мәселелер бойынша пікір алмасқан тараптар кездесу соңында естелік-сыйлықтармен алмасты.
