Осы жылдың наурызынан бастап қоғамдық орындарда балағат сөйлегендер 69 мың теңге айыппұл төлейді немесе 30 тәулікке қамауға алынады. Бұл жөнінде Қазақстан ішкі істер министрлігі хабарлады.
“Бүгінге дейін ұсақ бұзақылығы үшін 17 мың теңгеден сәл астам айыппұл салынатын немесе 15 тәулікке қамалатын. Жаңа редакция бойынша 69 мың теңге айыппұл салынады немесе 5 тәуліктен 30 тәулікке дейін қамауға алынады”, – деді ІІМ әкімшілік полиция комитетінің өкілі Азамат Құрымбаев.
Бұл түзету жаңа кодекс ресми түрде жарияланған соң 60 күннен кейін күшіне енеді.
Кейінгі жылдары әлеуметтік желіде қоғамдық орындардағы моральдық-этикалық мінез-құлық туралы пікірталас жиі байқалған.
Былтыр жазда Астана мәслихатының депутаттары көшеде түкіргендерге айыппұлды көбейтуді ұсынған. Бұл ұсынысты денсаулық сақтау министрі Ажар Ғиният қолдап, қоғамдық талқылауға шығару керек деген еді.
Өткен жылы Астана әкімдігі көлікте кетіп бара жатып түкіретіндерді мемлекеттік нөмірі арқылы анықтап, айыппұл салатынын хабарлаған. Алматы полицейлері де тұрғындарды көшеде түкірген автокөлік иелері туралы 102 қосымшасына фото және видео жіберуге шақырған.
Елде көшеде түкіргені үшін Әкімшілік құқық бұзушылық туралы кодекс бойынша бес айлық есепті көрсеткішке тең айыппұл салынады.
