Жаңа заң: 25 жасқа толмағандарға құмар ойнауға тыйым салынады

0
35
фото: tolqyn.kz

Respublica партиясының тең төрағасы Руслан Берденов, «Ойын бизнесі туралы» заңға өзгерістер ұсынып, оның екеуі қолдау тапқан.

  1. 25 жасқа толмаған тұлғаларға құмар ойындарға немесе бәс тігуге қатысуға тыйым салынады. Сондай-ақ құмар ойындарға немесе бәс тігуге қатысуы шектелген тұлғаларға да, егер олар туралы ақпарат Борышкерлердің бірыңғай тізімінде бар болса, тыйым салынады. Бұған дейін бұл бап ойыншылардың жасын 21 жасқа дейін ғана шектейтін.

Бұл өзгеріс құмар ойындармен айналысатын, қаржылық тәжірибесі жеткіліксіз, тұрақты табысы жоқ, «оңай ақшаны» іздейтін, бірақ оның салдарын толық түсінбейтін жастардың санын азайтады.

Сондай-ақ, бұл норма Борышкерлердің бірыңғай тізіміне енгізілген тұлғалардың қатысу мүмкіндігін шектейді. Оларды «тез және оңай» қомақты ақша алу ниетінен қорғайды және айыппұлдарды, салықтарды және алиментті тұрақты төлемеушілерге ойын-сауық мүмкіндіктерін жояды.

  1. Адамның құмар ойындарға және бәс тігуге қатысуға өзі қойған шектеулері. Бұған дейін заңда жеке тұлға кез келген ойын бизнесін ұйымдастырушыға жеке өтініш беру арқылы алты айдан бір жылға дейінгі мерзімге өз бетінше шектеу қоя алатындығы қарастырылған болатын. Жаңа түзетуге сәйкес, тұлға өзін шектеусіз, бірақ бір жылдан кем емес мерзімге шектеп, уәкілетті органға өтініш жаза алады.

Тәжірибе көрсеткендей, бұрынғы шектеу мерзімі жеткіліксіз болатын: құмар ойындарға қатысуға және бәс тігуге тыйым салынғандар тізіміне енгізілген кейбір азаматтар осы кезең аяқталып, тізімнен шығарылғаннан кейін белсенді ойнауды жалғастыратын.

Сондай-ақ, ойынға тәуелділіктің зиянын түсінген кейбір азаматтар құмар ойындарға қатысуға және бәс тігуге өмір бойына тыйым салуды сұрайды. Алайда, Заңда белгіленген өзін-өзі шектеудің қазіргі алгоритмі бұған мүмкіндік бермейді.

Жалпы, Respublica партиясының фракциясы ойын бизнесі қызметін шектеуге және ойынға тәуелділіктің таралуына бағытталған түрлі заңдарға 24 түзету әзірлеген.

ЖАУАП ҚАЛДЫРУ

Пікіріңізді енгізіңіз!
Мұнда аты-жөніңізді енгізіңіз