Turkish Airlines әуе компаниясы желтоқсан айында Астана мен Анкара арасындағы рейстерді, ал қарашада Алматы – Анкара бағыты бойынша тұрақты рейстерді іске қосуды жоспарлап отыр. Бұл жөнінде Индустрия және инфрақұрылымдық даму министрлігінің Азаматтық авиация комитеті хабарлады.
“Түрік Turkish Airlines әуекомпаниясы 20 қарашадан бастап А – 320 және Б-737 типті ұшағымен аптасына 2 рет Алматы-Анкара бағыты бойынша тұрақты жолаушылар рейстерін орындауды жоспарлап отыр. Сонымен қатар, 5 желтоқсаннан бастап әуекомпания Қазақстан мен Түркия астаналары арасында аптасына 2 рет А-320 және Б-737 типті бортпен дүйсенбі және сәрсенбі күндері жаңа рейсті іске қосуды жоспарлап отыр”, – делінген хабарламада.
Бұған дейін тағы бір түрік Авиакомпаниясы-Pegasus Airlines 1 қарашадан бастап Алматы мен Анкара арасында жаңа бағытты іске қосқаны хабарланған болатын. Қалалар арасындағы тұрақты рейстерде аптасына екі рет сәрсенбі және сенбі күндері А320 және В737 ұшақтары қатынайды.
